البحث عن ذاكرة لوطن مفقود..

عبيت زاودني الريقة من بايت القوى
بايت القوى الوطن الدشر …
غيمو الربط
ساعة بقينا من الروى ……
فرسخ مطر
سافرت لك بأشواقي لي آخر المنافي
بحت في كل المخافي ..
وكست عنك في الخرط
في التواريخ القديمة ..
التواريخ الرؤومة ..
بين نقوش نبتة ورسوما
في الطنابير العظيمة
وبين لغة مروي القديمة
وخط .. في خط
راجعت بك كل الأسامي .. البعرفا
كل الجمل ..
حتي الضمائر .. وأحرفا
صححت بك زمني الغلط
باختبك قلبي الشقي ..
وبشرتو بي لقياك عبط
يا طيبة زي شارع وسط ..
يمشيبو كادح وأرزقي
وممتنعة زي قبض المياه
والمافي
والما بتلقي
غالبني جيتك أصادفا
لا في المعابر والموانيء المترفة
لا في المطارات الوسيمة كما الفراغ
لا الأرصفة
كل الدروب التعرفيها وبعرفا
التألفيها وبألفا
خشيت دغيش سِعن الدني
المرفوع علي سيبات وفا
روابي كان قطاع غني ..
وشوقاً مفورن وانكفي
قدام خطي الوجد الِحفي
غابن صباحات القرب …
وبقت ضلامات الجفا
وضي المصابيح الجريح ..
كترت علي الريح …. وانطفا ؟؟؟
هوي يا بنية من الغبش ..
من حر أباطهم مترفة !!!
وين إنتي شان نرقد قفا
وين إنتي وين .. في يات دغش
ما بيننا بين غيبتك كفي
لو بق حسك في...
هشيم دبش الضياعات والسأم
زي أغنية شوق ..
زي نشيد ..
اندبي همسك زي نغم
او خب خطوك زي شهيد ..
رفت مسيرتك زي علم
ما كان مهابات الصقور
(نخت) تحت رخة رخم
وين إنتي وين ..
ما كان هجم ديش العجم ….
والدنيا ضو
وامسن سبايا الأغنيات
العزل … ألاه … شن تسو ؟؟؟؟
ولا في الكفوف الخاوية سيف …
لا في الكتوف الزاوية ضو !!!
دلَّجت درب الأربعين ..
براً
وبحراً
حتي جو
أشريك قلت من الزمن
واعتق معاك رقة مشاعري
أزوجك كل الوطن
كل الرجال الحملو أرضك بالحلال
وأفتق سحاب العشق شو
ولا بنتي في الزنج البجم …
لا كنتي في العرب الأشو
لا في شلوخا …
ولا الوشم ..
لا في شيوخا ولا في عو
بل فيك غشاني الزمن …
أداني صرصر وبعتو نو
كوترني .. بي حبل الوخم
كل ما انقطع تو .. بان لي .. تو
ناقز وراك ..
ناقز وراك ..
ناقز وراك ..
انترتعت رؤياى ..
هكع ..
ما بين أريت … يا ام زين … ولو
وبين تبقي وين ..
لاك في الوجود
لا في العدم
لا في الحقيقة … ولا الوهم
لا زين
لا شين
لا البين بين ..
يا راحة الباقالو هم
لا عنك أفتاني الزمان ..
لا منك انقطع العشم
يا ريتو أغناني الكمان
آ طيبة عنك صوتك نغم
من أعلي ميضنة فيي
كان أعلنت موتك للأمم
أو .. صح بجيتك لي الرمم
لكنو صمتك طال …
وحان ميعاد زفافي علي الألم
قلت أرفع أيديني وأقول …
خاني الصبر ..
خان وانهزم ؟؟؟
زي ما أتهزم كمين نبي …
وخانت علاي التاريخ ذمم
آ طيبة أخافك ؟؟؟ واللا اخاف
السبة واللعنة الوبيلة ؟؟
تحل ورايا كما الجفاف ؟؟
أو ….. تار علي أكتاف قبيلة ؟؟
معلمي الله من عتاد ..
يبرد حشاها .. ولا في حيلة
بلا تأمل في البعاد .. سنين ..
سنين .. ودنين .. طويلة
وكيف ؟؟ وكم ؟؟
والإنأخذ بالدم غصب …
مافي البرجعو إلا دم !!!!
آ طيبة هيلة ..
سلام
عوافي يا أصيلة .. كما المعانا
أو .. بديلة علي اللي مافي
يمه أدخلي علي غنانا ..
يا أمرقي من القوافي
يا أحذرينا وما تخافي
وما بنخيب حاشا ظنك …
ينفخوها وما بتموت
حية نارك … حية يوت
ختي قدرك في الأثافي ..
يوسف الفي الجب يمرق
ضاربا ريقة اليلقي قوت
روقي أكنك ..
واللا كنك ..
تاوقي في البحر الخرافي ..
يونسك في ياتو حوت
سمَّ ينده جوفو حافي ..
وهطينا علي الأثافي ….
وهبي نارك لا تموت
يا حمامة غار محمد ..
يا خيوط العنكبوت
يمة كسناك ضمة مافي ..
الدروب وين غيبنك ؟؟؟
في سؤالنا الضاري عنك ..
سدن أبوبن بيوت !!!!
والبيوت البشبهنك ..
انكرننا وانكرنك !!!
ننكشف لا لوم عليهن ..
بس ها كيفن يسترنك ؟؟
وفي سكاتنا الجاري منك
رحبن بينا السجون
الدرادر والمنافي
فينا من روَّح فدايتك ..
وفينا من لا زال …
وفينا
ما في من بدل لرايتك
وانتي في ذات السكوت !!!
التراب يتشهي حنك ..
السحاب عابر يفوت
واللا يكمد للعيون
بالغبار غمة وسوافي
وانتي يا آخر المرافيء
يا أم وجوداً صار خرافي
في صحاريك داخ غفاريك ..
من برد زمنو الرعافي
دون كواريك ..
مات واتاريك
غبتي بي كل المرافيء
يا لساريك .. لاك موافي
لا كمان قادرين نسيبك
نمشي في الزمن المجافي
ما عهدناك عاد تخافي
كانفعالات المراهق ...
شابكة كالشجر الضفافي
خيلك - الريح - حين تناهد
لوحة التاريخ بيشهد
لونا والدم الإضافي
إلا يا وتري وغناهو ..
راحة أنغامو .. وهناهو
يا نبي الثورة الغشاهو
برداً أكتر من غتاهو
إلا يا بت جاك زمن دارع الأيام قلب
الدفاتر والكتب
إستحمت بالغلب
التلاميذ النجب ..
طيشا الفقر ….
الغبينة
صنت الأجراس وجينا
إلا يا .. آخ … ما لقينا
الجوامع مستباحة ..
والمصلين صر جنب
الكنائس جالبا دينا !!
والمدينة تبيع عوينا !!!
لي النخاسية الغرب
لي اللحاسية وعقب
تشتري آفات الرعب
والهتافات الجرب
عربدت باسم السما ...
توكت ريح السحب
ومن ضروعاً .. كان تكب
كل أطفال الفقاري ..
وكلهن في فد شخب !!!!
في اللغة الجرسية .. سب
في التقي النجسية .. سب
في الوقار الفاوة .. سب
في شعار ما ساوي .. سب
واللا أريت ما كنا منك ..
لا في بيناتنا القرب
كنا أقلا نشوفو عادي
التردي الجاي وغادي
دسادي في النعم الزيادي
وابن آدم بالأيادي
لي سترة الحال يكافت ..
غابة غابة ..
ووادي وادي
ينبح المسكين يا طيبة ..
طيبة يا راحة الفتارى
وواحة الفي الصي حيارى
عورة الشرفاء الفقاري
سترها ولب المباديء
يا بنية الأجر أم خير ..
أو نبية الشجر الطير ..
يا رسول البسمة للأطفال …
حبيبة نيل بلادي
يا طليقة الغيم …
عروس طين البوادي
المناديل بانتظارك … والأيادي
معبأ شوق ..
يا طيبة ..
طيبة ..
طيــــــــــــ ..
ولا حياة لمن تنادي
بكَّاك بكيتي .. سكت برايا
كنت حافي علي إبر ..
بتَّ حابي علي شظايا
من انكسار رماش عيونك
فوق مسام سام المرايا
من كتر تعباً تعبتو ..
قلت ألقاك ما كفاية
يا تكملي في صمتك
يا أخلص بيك غنايا
دي الحنايا وراك يبست
ولامست عشميق الخلايا
وبت أمسد من حروفك
وأقتل الأيام .. قراية
بتق الغيم .. برضو أرضك
ما استجابت لي سقايا
وقلت أخطك بي دمايا
يا أصابعيني أبقي ريشة
ويا شراييني الدواية
وقنعي الريح الورايا
النكع بالخيل .. محالاً ..
يدي بي بقر الدرايا
انتهت كل الخفايا
وقلت أكوسلك في الخطايا
لما في ذات لقيا حر ..
وزاد هواكي علي هوايا
وقمت خنتيني معايا ؟؟؟
اشتكيتك لي القمر
لما أنسام السحر
الرياحين والزهر
شهدوا لي عليك يا اخية
جاء القمر سواك برية
وباعتزاز في إبرة حية
صاح في جمعنا يا برية
من يكن من غير خطية
.........
وقم رميتك بالتحية من اللي في
فيا ….وفية
يا معاكي تغيبينا ..
يا تعالي وابقي جية
للبعيشو غصب عشانك …
والبموتو بحسن نية
حار علينا بعد طراوة …
وبين عيون أحباب تقية
نبقي في كتمة وشقاوة
وبين أراذل
وارزقيـ……ـة
كفاك شكية !!
يا التشرك لي غمامك …
وتحتك الأنهار قوية
ما انسرق ذات ليل سنامك …
لو قبيل كست الحوية
كفاك شكية !!
وما بيضيع حق لا قضية
لو في طلاب من وراهو
ونية بيضاء وبندقيـ……ـة